सर्वोच्च अदालतले नेकपा एमालेका सचिव महेश बस्नेत लाई अदालतको अवहेलना मुद्दामा लिखित जवाफ पेश गर्न आदेश दिएको छ।
न्यायाधीशद्वय तिलप्रसाद श्रेष्ठ र महेश शर्मा पौडेल को संयुक्त इजलासले बस्नेतलाई लिखित जवाफ पेश गर्न निर्देशन दिएको हो।
अधिवक्ता लबन न्यौपाने ले गत बुधवार सर्वोच्च अदालतमा बस्नेतविरुद्ध अदालतको अवहेलना मुद्दा दायर गरेका थिए। निवेदन अनुसार, बस्नेतले प्रेस चौतारी नेपालको माघ ११ गतेको कार्यक्रममा सर्वोच्च अदालतका न्यायाधीशलाई लक्षित गर्दै अभिव्यक्ति दिएका थिए।
रिट निवेदनमा उल्लेख छ कि बस्नेतले ‘प्रधानन्यायाधीश लगायत न्यायाधीशज्यूहरू लाग्दै नलागेको रोग लागेर गायब हुने, न्यायिक प्रक्रिया आतङ्कित भएर, डराएर अथवा लोभ–प्रलोभनमा परेर अथवा हस्तक्षेप भएर प्रक्रिया ढिला गर्ने, न्याय नदिने, दबाबमा पर्ने…’ भनी अभिव्यक्ति दिएका थिए।
साथै उनले भनेका थिए, ‘हामी वैदेशिक आक्रमणमा छौँ र हाम्रो सर्वोच्च अदालत, उच्च र जिल्ला अदालतहरू मात्र जलेका होइनन्, हाम्रो न्याय प्रणाली नै जलेको छ भन्ने कुरा यसबाट अनुभूति हुन्छ,’ जसलाई रिट निवेदनमा अदालतप्रति सार्वजनिक रूपमा हुर्मत लिने कामको रूपमा उल्लेख गरिएको छ।
-1772177803.jpg)
